OBD er heiti á búnaði í bílum sem skynjar bilanir og gerir bílstjóra viðvart um þær með því að kveikja ljós í mælaborði. OBD kerfið gerir eiganda bílsins eða viðgerðarmanni kleift að bilanagreina hina ýmsu hluta á vélinni. Síðan þetta kerfi kom fyrst á markað á áttunda áratug síðustu aldar þá hafa upplýsingar sem hægt er að lesa úr því verið mjög misjafnar, þegar þetta kom fyrst í bíla þá kveiktu þeir bara ljós í mælaborðinu ef vart var við bilun en það var ekki hægt að lesa út neinar upplýsingar um bilunina.

Kerfið þróaðist svo hægt og rólega og árið 1991 voru margir bílar komnir með OBD-I kerfið sem var ekki staðlað kerfi og því allir hlutir misjafnir á milli bíltegunda, sem gerði það að verkum að það þurfti að nota tölvur frá umboðunum til að kóðalesa bílana. En þrátt fyrir það þá var hægt að kalla fram bilanakóðana í þessum bílum með því að tengja saman tvo víra í OBD-I tenginu sem var þá staðsett í vélarrými bifreiða og var misjafnt í útliti eftir bíltegundum. Þegar þessir vírar voru tengdir saman þá blikkaði vélarljósið í mælaborði bifreiðarinnar og gaf þannig upp númer bilanakóðans. Númer kóðanna var á þessum tíma tveggja stafa tala og bilanakóðarnir voru ekki margir, kannski 12 eða eitthvað nálægt því. En ljósið blikkaði þá t.d. hratt 5 sinnum og svo kom smá pása og aftur 5 blikk og svo sama endurteknin ef bilanakóðinn var númer 5. Þegar búið var að framkalla númerið þá þurfti að fletta því upp í viðgerðarbók til að fá nánari upplýsingar um heiti kóðans og bilunina. Þegar það var svo búið að gera við bilunina þá var hægt að þurrka út bilanakóðann með því að tengja saman aðra tvo víra í OBD-I tenginu.

Í dag er þetta kerfi orðið að OBD-II og er staðlað í bílum sem gerir alla hluti einfaldari og þægilegri að vinna með. Það keyrir í rauntíma svo hægt er að lesa út gildi á öllum skynjurum vélarinnar til að auðvelda bilanaleit. Allir bilanakóðar eru staðlaðir og þar með eins á milli bíltegunda, þeir eru orðnir mikið fleiri og númer kóðanna eru orðin allt önnur en voru í OBD-I kerfinu. Nú eru númerin einn bókstafur og svo fjórir tölustafir á eftir, fyrsti stafurinn í kóðanum (bókstafurinn) segir til um tegund bilanakóðans, P (Powertrain) er fyrir vél og gírkassa, B (body), C (Chassis) er fyrir undirvagn og U er fyrir netkerfi. En þrátt fyrir þennan staðal þá er framleiðendum frjálst að bæta við kerfið sínum eigin bilanakóðum og rauntímafyrirspurnum. Þá bilanakóða kalla ég tegundatengda bilanakóða.